Es deputacions provinciaus son es òrgans de govèrn dera província e an caractèr supramunicipau.

Son òrgans d’eleccion indirècta, donques era sua composicion s’establís a compdar des resultats des eleccions municipaus.

Es deputacions provinciaus son òrgans de caractèr supramunicipau. Es competéncies basiques qu’an es deputacions provinciaus son en matèria d’assisténcia e cooperacion juridica, tecnica e economica as municipis.

Eth nombre de deputats que correspon a cada deputacion provinciau se determine segons es residents de cada província, d’acòrd damb era escala que seguís:

 

• Enquia 500.000 residents: 25 deputats

• De 500.001 a 1.000.000: 27 deputats

• De 1.000.001 a 3.500.000: 31 deputats

• De 3.500.001 endeuant: 51 deputats

 

Es juntes electoraus provinciaus repartisssen, proporcionaument e en tot atier eth nombre de residents, es lòcs corresponenti a cada un des partits judiciaus eth dètzau dia posterior ara convocatòria d’eleccions.

Es juntes electoraus de zòna hèn eth repartiment des lòcs des deputacions provinciaus, un còp constituïts es ajuntaments dera província, dera manèra que seguís:

 

• Se hè ua relacion de toti es partits politics, coalicions, federacions e agropacions d’electors qu’agen obtienut aumens un còsso laguens deth partit judiciau, en orde decreishent segons es vòts obtienudi.

• Un còp hèta aguesta operacion, era junta electorau de zòna hè eth repartiment des lòcs que corresponen en cada partit judiciau as formacions politiques, mejançant eth procediment dera lei de Hondt, segons eth nombre de vòts obtienudi.

Un còp hèta era assignacion des lòcs de deputats, era junta electorau de zòna convòque separadament, laguens es cinc dies següenti, es còssos des partits politics, coalicions, federacions e agropacions d’electors qu’agen obtienut lòc de deputats, entà qué triguen, d’entre es listes de candidats qu’an er aval d’aumens un tèrç d’aguesti còssos, es qu’an d’èster proclamadi deputats, ath delà de tres suplents.

Un còp hèta era triga, era junta electorau de zòna proclame es deputats elèctes e es suplents.

Mapa de CatalunyaCatalonha ei format per 947 municipis acorropadi es 41 comarques